書法的印記 德記印務公司

「你哋知道邊到係香馨里嗎？」店主任國華問我們。那是一條已經算是消失了的街道，當時香馨里貫穿文咸西街與皇后大道西，因為聚集了不少潮州打冷店而有「潮州里」之稱。自大型樓盤帝后華庭落成後，香馨里亦已經面目全非，剩下的街道則改建為小公園。今次訪問的主角德記印務公司當年就是在上環的香馨里開業，後來因為上環皇后街的重建項目而遷現址的薄扶林道。

印刷業的衰落

德記印務於六十年代開業，現在由第二代店主任國華繼承父業。「以前我哋係用活版印刷，由執字粒到排版和印刷需要較長嘅時間，依家好多傳統嘅印刷舖都轉咗用柯式印刷喇。」任先生說。隨著印刷技術不斷進步，傳統的印刷業已近被新式的數碼打印所取代。「好似印結婚請帖，以前大家去囍帖街搵傳統嘅印刷舖印，依家年輕人都會幫襯一站式婚宴公司，我哋唔會再接到呢類嘅訂單。」任先生見盡香港印刷業的變遷。

喀拉喀拉

雖說生意已經大不如前，德記還有一班忠實的老客戶支持。替他們印刷發票和收據，背後靠的就是藏在店舖中央的舊式印刷機。「如果係呢啲印刷量較少嘅發票和收據單，我哋都仲會用活版印刷，因為用活版印會比較化算。呢啲單印出嚟嘅數字每張都需要唔同，活版就可以設計成每印一張就推動一個數字嘅鉛字，順序印落去。否則，每張都要整一個唔同嘅版，成本太高喇。」聽著喀拉喀拉的印刷聲音，我們要面對的是，活版印刷的知識在不久的將來將會失傳。

德記生招牌

其實，德記印務最「筆為人知」的是店外的招牌。招牌裡的德記印務四字由書法名家卓少衡題字，並有自己名字作落款。任先生表示卓少衡和家父份屬好友，舊店在香馨里的時候已經相識，故分文不收免費為德記題字，此招牌至今一直伴隨到新店現址。據任先生表示，間中有不少書法愛好者前來替其生招牌拍照。每一個老招牌的背後亦有其自身的故事，配上書法家度身訂造的字體，絕不能跟現時由電腦字體設計而成的招牌可作比較。

開業歷史 - 1960年代

業務 - 印刷

地址 - 西營盤薄扶林道20號地下

電話 - 2546 3987









-----------------------------------
各位喜歡筆為人知的朋友，
請你like & follow我們的Facebook Page，
給筆為人知一點支持和鼓勵。😃

https://www.facebook.com/untold.hk/

-----------------------------------

回憶的味道 德興隆豆腐鋪

究竟一間前舖後廠的豆品店，每天營業多少個小時呢？下午一時許，第三代的東主廖先生說他要回家稍作休息，事關他當天已經在店工作了九小時！筆者有幸能與廖先生作簡短的傾談，小休過後他還要回來收拾和準備明天的工作。

豆品四小隆

有六十多年歷史的德興隆，是北角區內豆品店的老字號。這條熙來攘往的馬寶道，滿佈街市攤檔和雜貨舖，行人專區的排檔把德興隆遮擋住著，可能只有熟路的街坊會懂得鑽進內街光顧。「我阿爸講返，以前做豆腐嘅有四個隆：順興隆、同興隆、德興隆、永興隆……」當年四大豆品老字號，今天只剩下長沙灣的順興隆和北角的德興隆。四年前舊樓清拆，德興隆面臨結束六十年的業務，廖先生不忍心放下三代建立的基業，於是找到毗鄰的現舖讓老舖得以延續下去。

祖傳秘方

廖氏三代都住在北角，多年來的做法不變，豆漿堅持是用明火烹煮，從不考慮改用電煲。除此之外，德興隆的經營方法都是「貴精不貴多」，著重質量而不著種品種繁多，而且更以價錢廉宜吸引流水客和保留一直支持的老街坊。雖然店面環境較窄，但店內懷舊的裝潢、海報和掛牆餐牌，讓顧客恍如回到過去一樣。

難忘的創業故事

「嗰陣試過自己開分店，但都唔成功。」廖先生說，豆品廠一但多開分店，在產品生產上很難有絕對的質量保證。「始終機製嘅豆品嘅豆味無咁香濃，我以前開分店都試過用呢啲機，所以落得都幾大。」雖然當時分店大部分的製作方法和本店的做法相似，但重新讓街坊認識廖先生的新店並不容易。「天時、地利、人和其實都好重要。」廖先生在創業路上學了寶貴的一課。

開業歷史 – 1953年

業務 – 豆品

地址 – 北角馬寶道1號Q地下

電話   – 2563 8815










-----------------------------------
各位喜歡筆為人知的朋友，
請你like & follow我們的Facebook Page，
給筆為人知一點支持和鼓勵。😃

https://www.facebook.com/untold.hk/

-----------------------------------

根在觀塘 海記文具

哪一支原子筆比較好寫，哪一塊擦膠會擦得特別乾淨，哪一卷膠紙比較黏，這些看似簡單的問題，並不代表連鎖文具店的小職員可以給你一個滿意的答案。遇到這些難題，筆者誠意邀請你和海叔請教一下。今年已經七十八歲，人稱海叔，本名勞國坤，是觀塘海記文具的店主，在文具市場實戰超過四十年。因為裕民坊重建的關係，海記文具被迫於兩年前搬到現址的臨時小販市場。觀塘很多老街坊已經搬走，海記的生意現時只能靠熟客親臨這個閉門「市集」來維持。

沒有人流的市集

筆者到訪「市集」當日，發現的情景是店主多過客人，有部份店舖的招牌已經除下，只剩下吉舖。「當初大家搬入嚟嗰陣都好有期望，亦吸引咗啲新人入嚟做。但係過咗一排，你無班熟客支持真係好難做，嗰場嘅鋪位又細，走廊又窄，冷氣又唔夠，啲人點會入嚟幫襯？我就無所謂呀，係生意少咗好多，但係其他檔主好多都要養妻活兒，你話點算呢？」海叔指責市集負責人沒有用心去設計和營運這裡。見證著觀塘的變遷，老街坊海叔最懷念的始終是舊日的裕民坊。

薄利多銷

為什麼大家稱呼你為海叔？「我當年環境唔好，收入少，我阿叔喺北角春秧街開文具舖，就提議我喺觀塘開番間幫補吓。佢就同啲供應商講要喺觀塘開分店，分啲貨俾我們喺度賣。我呢間舖都喺借阿叔嗰名開。」憑藉真．海叔的提攜，海叔能夠以低一點的價錢直接向供應商取貨，觀塘街坊們亦因此而受惠。「呢支原子筆，我可以賣平過出面啲舖頭一、兩蚊，因為佢哋要向批發商攞貨，入貨價自然會貴啲。」

品質保證

「嚟咗呢邊開舖，啲生客唔明白點解有啲貨你賣得貴過出面。」海叔二話不說拿起一塊收在暗角的擦膠作示範。「你試吓擦就知，呢舊日本製嘅櫻花牌擦膠擦得特別乾淨！櫻花公司只係做大公司，好少俾批發商做零售。所以我都喺留番呢啲貨俾熟客，唔擺出嚟賣，費事俾其他人以為我sell野啦！」日本製vs.中國製，不用多講，相信勝負已分。

「做生意千祈唔好呃人，一定要賣正貨。」整個訪問過程中，海叔多番提及自己賣的一定是正貨。「喺呢到買嘅原子筆，一定可以番嚟配到筆芯。」生意之道，其實就是這樣簡單。

開業歷史 - 1976年

業務 - 文具

地址 - 觀塘同仁街小販市場58號檔

電話 - 9498 6420

-----------------------------------
各位喜歡筆為人知的朋友，
請你like & follow我們的Facebook Page，
給筆為人知一點支持和鼓勵。😃

https://www.facebook.com/untold.hk/

-----------------------------------

養生之道 蓮生莊

筆者走進平凡的荃灣街市街街市，發現一間不平凡的小店。一般街市多賣蔬菜、肉類、水果和雜貨，給人的感覺都是亂髒髒的。然而，這間二十二號的地舖卻份外光鮮，讓人有煥然一新的感覺，它就是《蓮生莊》。店主Terry讀藝術出身，但因為家族曾做過中藥材的影響，自小對中藥便有一定的認識。七年前，Terry決定放棄專業，自己打本開藥材店。「 本身爸爸都係做中藥嘅，做咗四十幾年，不過佢嗰套就舊得滯啦，要打破自己嗰嗰框框先有突破……」

曾幾何時的樓上舖

當初的蓮生莊是一間樓上舖，為了讓客人知道小店的存在，Terry在宣傳推廣上下了不少功夫。「要自己親自派傳單都幾辛苦，一嚟日曬雨淋辛苦啦，二嚟就係自己設計嘅傳單，如果啲人睇都唔睇就丟咗，真係唔係幾好受。」除了派傳單外，他還會在網上出廣告做宣傳，但始終未有顯著成果。後來Terry 發現中藥這一行其實需要客人親自吃過覺得可信才會安心去買，於是便把樓上舖的蓮生莊拉回地面，把店搬進街市街街市內。「之後生意就好咗啲，不過你要習慣喺街市，因為以前慣咗喺office 做嘢，但而家就無冷氣，而且仲要接受地下污糟邋遢……」Terry笑說。

賣藥者言

不少商家都會用硫磺加工藥材，因為燻過硫磺的藥材有驅除蟲害的作用，讓其可以保存得更持久。可是，超標的藥材不但不能養生，反而會影響健康。「其實喺0.3克以下嘅情況下，硫磺係可以作為藥用……假如藥材真係有硫磺嘅話，用水洗過就應該無問題，只不過嗰陣味喺煲湯入面會帶有硫磺嘅酸味。」Terry 說，蓮生莊所賣的藥材都不含硫磺，讓這些天然無添加的藥材更能發揮藥用功效。「比如飲五劑藥，如果你藥材靚嘅話，可能飲兩、三劑就做到同樣嘅功效。」究竟天然的藥材和有硫磺加工過的藥材表面上有何分別？Terry以淮山作為一個例子。「原色淮山唔會咁白咁直嘅，而且煲咗湯之後會發大，但唔會有酸味。」天然的藥材賣相沒有加工過的吸引，如果是外貌協會的你，可能分分鐘會錯過天然藥材的「內在美」。

優化服務

為了有更專業的知識去經營蓮生莊，Terry當時便到香港浸會大學修讀中藥配劑文憑課程，一讀便讀了兩、三年。「中藥唔係好似中、英、數咁簡單，你背完讀完之後仲要keep住做先記得。」對於上一代的經營方式，Terry有不同的看法。「上一代的經驗當然好啦，因為佢哋要落手落腳去做，喺製藥方面會非常熟悉，但唯一嘅問題係佢地唔會同客人解釋清楚，有啲中醫就算你問佢嘢，佢可能會唔睬你。其實少少嘅改變，同客人解釋清楚，就已經令到個成個服務唔同晒。」店內三十多種湯包，都有標籤註明產品功效和用法，若果有疑難的話，Terry亦會一一為你解答，讓你安心選購。

開業歷史 – 2010年

業務 – 藥材

地址 –  荃灣街市街街市地下22號舖

電話   – 5398 5904









-----------------------------------
各位喜歡筆為人知的朋友，
請你like & follow我們的Facebook Page，
給筆為人知一點支持和鼓勵。😃

https://www.facebook.com/untold.hk/

-----------------------------------

人情味米舖 成興泰米行

「呢架係用嚟『飛砂走石』嘅機囉！」德叔笑說，隨即把米嘩啦啦的倒進風米機裡。「以前啲米有砂，你睇吓呢邊啲雜質！啲人唔鐘意啲米污糟㗎，污糟佢哋唔鐘意食。」明知現在米廠的食米已去掉雜質，但德叔仍堅持用風米機再過濾一遍，讓客人食得更安心。

飛米轉芻

駕著鳳凰牌單車不慌不忙地穿梭馬路的十字路口，德叔把這部七、八十年代的專用搵食車停到樓下，把後座的米托在肩上，一步一腳印的登上沒有電梯的唐樓。「主要都係方便啲老友記街坊，佢哋有啲行路唔係咁方便，所以會打電話嚟落單要我送貨。」談到最開心的事，德叔就說能與街坊聊聊天，寒喧幾句，客人一句「你食咗飯未？」就已經很滿足。

米飯班主

成興泰在石硤尾邨屹立了四十多年，德叔是這間傳統米舖的第二代太子爺。德叔說，以前米店有專門的溝米師和送貨師傅，自從超市開始引入袋裝米後，「糴米」的人越來越少。以前為太子爺的德叔，每天只需要敲敲算盤，但現在則要身兼數職。其實溝米有如度身訂做一樣，因應客人的口味，新米和舊米混合的比例會有不同。「袋裝米根本無得比。」德叔說，新米較為軟身，加上少許舊米會更好吃。這些民間智慧近年得到一些中產客的青睞，有些更會周日專程開車到石硤尾找德叔取貨。

柴米油鹽

除了散裝米外，成興泰還有散裝油賣。散裝花生油主要來自非洲，其色澤比一般市面上的花生油較深色，而且味道更為香淳濃郁。「七十年代石油危機，啲人都驚通漲膨漲，驚銀紙唔值錢，即刻一窩蜂咁嚟排隊。」德叔憶及當年的難忘時刻。「年紀一大咗佢哋都去老人院就少咗幫襯，有啲老咗又過咗身，所以食米都食少咗。」全賴德叔對產品質量的保証，成興泰都一直有新的客人，讓米舖的營業額得以維持。

開業歷史  - 1972年

業務  - 米行

地址  -  石硤尾邨19座地下107舖

電話 - 2779 1933










-----------------------------------
各位喜歡筆為人知的朋友，
請你like & follow我們的Facebook Page，
給筆為人知一點支持和鼓勵。😃

https://www.facebook.com/untold.hk/

-----------------------------------