矛盾中生存 榮利文具紙業

還記得小時候每次經過紙紮店，婆婆總是帶著我「急急腳」走過，似是告訴我這些東西小孩子是不應該接近。位於筲箕灣的榮利文具紙業卻在這團矛盾中生存，文具、玩具、香燭和紙紮同時在店內出售，好叫小孩們不知應否再走近一些。

文具和祭品

「依家呢一代少咗好多人燒衣拜祭，加上我哋有時都需要用吓啲膠紙、釘之類嘅文具，所以呢幾年就開始兼營文具和玩具，當喺幫補吓啦！」榮利現時的負責人吳太說。「我喺接手我老爺間舖嚟做，榮利賣香燭紙紮做咗六十五年喇。當年我老爺住喺愛秩序灣木屋區嗰邊，佢自己親手整香、曬香再喺舖頭賣。」榮利的舊址在筲箕灣工廠街，由於唐樓拆卸的關係，六年前榮利搬遷到現時的南安街。

報夢

如上所說，家人總是不想小孩子接近紙紮店是有原因的。吳太向我們說一個故事，是來至她的顧客，信不信……就由你來決定吧！「有一個客人，佢嘅小朋友三歲嗰陣發現會睇到嗰啲野。有一次，佢爺爺報夢俾佢聽叫佢去榮利買啲野俾佢。嗰朝早九點鐘，佢哋就企喺舖頭前面等我開舖，話要買野燒俾爺爺。入到舖頭，小朋友就同佢爺爺傾計，問佢呢件得唔得呀，呢件好貴喎，我哋就梗係睇唔到啦！」世事無奇不有，不能用科學去解釋靈異的事情，反正筆者就是信了！

年輕人不再迷信

夠驚嚇嗎？吳太再和我們分享一個另類「驚嚇」的故事，今次故事的主角是一位年輕人。「有位年輕男士入嚟話想睇啲名牌手袋，同佢傾多兩句，先知道原來佢女朋友仲在生，諗住生日俾嗰驚喜佢，依家啲後生仔真係好玩得。」店內的紙紮祭品果然真是包羅萬有，先人同樣可以享有iPhone、notebook、遊艇、名車、私人飛機等等不同類別的奢侈品。每件雖則是巧手製品，但是你真的有膽量跟你的摯愛去開這樣的玩笑嗎？

開業歷史 - 1953年

業務 - 祭祀用品

地址 - 筲箕灣南安街9號地舖

電話 - 2560 7074











-----------------------------------
各位喜歡筆為人知的朋友，
請你like & follow我們的Facebook Page，
給筆為人知一點支持和鼓勵。😃

https://www.facebook.com/untold.hk/

-----------------------------------