眾多訪問中，受訪者能把興趣轉化為自己的生意的確並不太多。今次的受訪者陳良是其中一位「幸運兒」，實行每天「寓工作於娛樂」。
原本是酒樓點心師傅的陳良，在沙士期間因為酒樓倒閉而失業。「沙士果段時間飲食業生意好差，酒樓飲茶嘅人好少。我自己本身都有養魚，呢間舖上一手都係做水族生意。失業期間遇到呢間舖出讓，既然做開嘅酒樓都執左笠，不如試下頂手做一做。」一試，陳良就「試」了十二年。
見證第二街的興衰
「最初經營果陣生意都唔錯，以我所知，當年西環區都有五間水族舖。」
陳老闆笑著說：「依家附近應該得番我一間舖，點解？你望下我個囡就知啦！年青人個個都玩電話，仲邊有人養魚㗎！」陳老闆繼續大吐苦水。「好多人以為地鐵開通後呢區會變得好旺，絕對唔係啦！交通方便之後，街坊反而多左去外區消費。附近舊樓又被財團睇中而提出收購，養魚嘅老街坊都己經搬走哂。」的確，從陳老闆的店舖望去對面的馬路，所有的店舖已經沒有再營業，而樓上的住宅相信亦是十室九空。
老顧客的情
「依家最主要都係靠一班熟客幫襯，有幾個客搬左去北角，甚至馬鞍山都專登番黎搵我，真係好難得！」陳老闆說到這裡，就想起一個令他印象深刻的客人。「第一次幫襯果陣佢講話失業左一段長時間都搵唔到工，就叫我幫佢揀八條金魚。無幾耐佢就番嚟話我知佢有三份工叫佢做，我諗應該喺擺風水陣啦！直到依家佢仲有嚟幫襯……」
「依家主要喺基於興趣而繼續經營，租金又唔平，我老婆依家都要出去打份工先夠使，如果我出去搵份工做，應該都搵到萬七、八蚊，好過依家搵一萬蚊都無。」陳老闆感慨地說。可見，港鐵開通並不一定可以帶旺區內小店的生意，甚至可能因為租金的增長而導致收支平衡的壓力。
開業歷史 - 2003年
業務 - 水族地址 - 西營盤第二街107號地下
電話 - 2547 2198
沒有留言:
張貼留言