當西營盤站開通後，西區的地段不再讓人覺得隔涉。區內的唐九樓、鹹魚欄、茶館和海味舖等，都保留著舊香港的氣息。走過第三街和正街的街角，你會看到這間有九十年歷史的老字號—關興記。
從第一街說起
「呢度約莫係二零年代左右開始，當年我老爺話佢十七歲同佢爸爸挑擔上街賣，之後喺大排檔做，跟住就入舖頭做。後來我問返我姑奶，原來最初都係喺第一街開始。」當時上一代的老人家沒有置業，店舖都是租的，若大廈遷拆的話樓下的店舖都要被迫遷。關興記於是由第一街搬到第二街，九零年代再遷至現在的第三間店舖經營至今。
轉型以維持
由2000年開始，關興記便慢慢轉型，由原來只做荳品變成以荳品和雜貨兩類招徠街坊。「因為請人難啊，就算而家香港都係啦，好似你哋讀完書出嚟都唔會話走去做啲勞動嘅嘢，所以我哋就將腐乳嘅工場搬咗上大陸，跟住豆腐我哋就唔做喇，交俾元朗一間工場去做。」不如大型超市一般「以量取勝」，關興記不會囤貨，儘量為迎合街坊需求而彈性入貨。話雖有多個工場生產，但關興記依然保存著一般荳品店「前舖後廠」的格局，每天仍會磨新鮮的豆漿。
商標的故事
很多老顧客都知道，關興記是以觀音作註冊商標，而以宗教圖像為商標的品牌現在都較難得到政府通過，可見關興記歷史悠久。除了香港外，關興記亦有出口東南亞，當中以馬來西亞為最大的市場，全盛時期有二十家合作的貿易公司。
正因為老字號的原因，有幾家不法商家曾以「關興正記」冒充「關興記」，並肆意宣揚關興記停止出口的消息。「當時搞到我一張貨單都無，但我係一個唔認輸嘅人，於是我就日日搵馬來西亞領事館問，後來先知道當地以為我唔做，咁我就同當地報館聯絡登一段廣告，話我無第二個品牌同埋關興記依然有做出口，如需要接洽嘅就同我聯絡。之後我先至慢慢將馬來西亞嘅市場攞返番嚟。」
西環徐小鳳
「你今日見我著到咁靚，因為我今晚表演！」關太笑說。「今晚喺中山公園有個盤菜宴，咁啱有人叫我去唱，我咪唱囉！平日返工都唔會有時間，呢個都算係我一大興趣。」工作之餘，關太也會一展歌喉，亦曾有考獲過皇家舞蹈學會社交舞的証書，後因腰部受傷而停止跳舞，轉而教學烹飪，所以各行各業都有她的足跡，「西環徐小鳳」之名豈是浪得虛名。
開業歷史 – 1928年
業務 – 豆品
地址 – 西營盤第三街65號地下
電話 – 2549 8625-----------------------------------
各位喜歡筆為人知的朋友，
請你like & follow我們的Facebook Page，
給筆為人知一點支持和鼓勵。😃
-----------------------------------
沒有留言:
張貼留言