鹹魚，可算是見證著香港逐步邁向繁榮昌盛的印記。從前的香港人，很喜歡掛在嘴邊說「鹹魚送飯，咁就一餐喇！」。在西營盤梅芳街只此一家、唯一售賣鹹魚的伍惠記，店主伍國祥卻看著鹹魚舖逐一消失，「鹹魚欄」已變成了「海味街」。傳統的鹹魚業，就是靠伍生伍太每天在細小的綠色鐵皮檔默默地守護著。
昔日的鹹魚欄
剛才所指的「鹹魚欄」，正是「從前」的梅芳街。「以前呢條街係私家街，唔受政府監管，兩邊都係賣鹹魚嘅排檔。後來因為衛生嘅問題，政府就收番呢條街，俾消防車可以係有需要嗰陣入到嚟，仲將啲檔口排番去我依家嘅呢邊，我哋伍惠記就由街頭搬到依家喺中間嘅呢個檔口位。」檔主伍先生說。「伍惠就係我爸爸，佢七歲走難落嚟香港，做過執高爾夫球波、賣煙、補鞋，輾轉到咗梅芳街跟師傅學整鹹魚。」伍家的第二代也繼承了爸爸出色的醃鹹魚手藝，可是現在的梅芳街只剩下伍惠記一間專賣鹹魚的檔口，鹹魚欄已變得虛有其名。
鹹魚翻生？
「你醃鹹魚幾叻都無用，因為依家香港已經無魚俾你醃。」伍先生慨嘆地說。「以前我哋會去魚類統營處攞鹹鮮，然後再親手將每條鹹魚曬乾，要落幾多鹽，曬幾耐，全靠師傅嘅經驗和手藝。但係九七之後，全世界嘅水產開始越嚟越少，魚類統營處亦取消咗批發鹹鮮，所有嘅鹹魚已經喺外地醃好進口香港，我哋唯有轉營做買手，憑自己的經驗去揀靚嘅鹹魚返嚟賣。」經常聽老人家說現在的食物吃不到從前的美味，鹹魚相信是一個很好的例證。外地講求大量的公式化醃製，又怎可比得上伍惠記的家傳手藝呢？
鹹魚白菜也好好味
鹹魚分梅香和實肉兩種。伍太和我們分享鹹魚的最佳食法：「實肉鹹魚蒸出嚟無咩香味，好似食雞胸肉咁一片一片，講求食質感；梅香鹹魚無條魚嘅味都好唔同，馬友因為好香，所以最多人鐘意，適合用嚟蒸肉餅或者整XO醬。仲有呀，每一個水域啲魚嘅質地都有唔同，孟加拉啲肉實淨啲，而越南魚嘅肉比較淋身啲。」上一代的老人家才是鹹魚的忠實粉絲，據伍先生說，就算是年輕人來買鹹魚，背後的真正用家也是他們的父母或祖父母。「依家啲人成日話食鹹魚無益，又唔見食環處話唔俾我哋賣？世衛都叫大家唔好食醃製食物，但係幾多年青人食Parma Ham呀！」
「做生意其實唔難，做得好啲客自然會再嚟幫襯，所以一定要處理好每一條鹹魚，識得曬得靚！」面對著夕陽的鹹魚業，伍生伍太仍處之泰然，深信好的鹹魚也能覓得知音，鹹魚還是有機會會「翻生」的。
開業歷史 - 1940年代
業務 - 鹹魚
地址 - 西營盤梅芳街6號牌
電話 - 2548 1185-----------------------------------
各位喜歡筆為人知的朋友，
請你like & follow我們的Facebook Page，
給筆為人知一點支持和鼓勵。😃
-----------------------------------
沒有留言:
張貼留言