大埔手信 澳門鳳城餅家

「埋嚟試食吓喇，有新鮮即製杏仁餅同埋花生糖呀！」為食的筆者被鳳城職員的叫賣聲吸引著。筆者再看一看招牌，原來大埔也能嚐到澳門傳統小食的味道，街坊們真是有福了。店主李先生來自製作杏仁餅和蛋卷的家族，而李太自小在澳門長大，出身於涼果世家。兩人婚後夫妻檔，一起在香港發展並傳承家族的美味小吃。

堅持手作

「我屋企人喺澳門有七間分店，分別由七兄弟姊妹打理。澳門手信街啲舖租太貴喇，所以我決定喺大埔附近試吓啦！」李太說。「我哋早幾年喺大埔林村曾經自設工場，但喺覺得交通唔太方便，依家啲餅我哋就喺返呢嗰舖自己造，涼果就喺澳門工場造，因為呢到無咁大地方可以曬啲涼果。」無論有多辛苦，李生李太依然堅持親手製作，為客人保留著最傳統的美味。

凌晨一時開工

「我哋都有試過用全機械化去造餅，然後俾啲熟客試食，佢哋一食就食得出有分別，話食落無口感。街坊生意要講誠信，所以我哋會繼續手造，凌晨一點鐘起身開工都無辦法……」據李太透露，下半年是鳳城餅家的旺季，兩夫婦每天凌晨一時便要起床以準備所有手工製的餅食，一直工作至下午午飯時間，才能在舖後小睡一小時。「你望吓呢張舊相，依家嗰樣真喺殘咗好多！」但是，李太依然精神奕奕向我們介紹鳳城的出品。

鳳城出品

「依家年輕一代少咗食涼果，其實涼果有好多益處，喉嚨唔舒服可以食八仙果、佛手果，如果咳嘅話就食啲薑，我哋嘅首烏薑喺家傳秘製㗎！」除了涼果外，筆者還試食了鳳城最受顧客歡迎的四寶糖。四寶糖的材料分別就是腰果、合桃、葵花籽和果仁，配上少許黑糖製作而成。粒粒飽滿的香脆果仁，口感層次極豐富。試食過後，筆者也忍不著帶一些回家和家人分享。

「最開心當然係見到啲客人鐘意我哋嘅食物啦！好多老人家山長水遠入到嚟大埔搵我哋，就喺想食番自己喜歡嘅傳統味道，我哋做得幾辛苦都係值得嘅！」

開業歷史 - 2012年

業務 - 餅店、涼果

地址 - 大埔富善街65號

電話 - 5616 4498











-----------------------------------
各位喜歡筆為人知的朋友，
請你like & follow我們的Facebook Page，
給筆為人知一點支持和鼓勵。😃

https://www.facebook.com/untold.hk/

-----------------------------------

幸福使者 大妗姐華姨

「大妗姐係囍宴嫁娶嘅中間人，你有睇過粵語殘片都知啦！」華姨笑說。「其實依家唔係一個媒人嚟喇，上一代嘅大妗姐係『媒人婆』，由雙方又唔相識、直到相識到談婚論嫁都係由大妗姐做嘅，但依家『說媒』唔需要大妗姐做，只係集中婚宴嘅儀式。」在上一代的傳統婚宴中，大妗姐是不可或缺的一員。

天官賜福

大妗姐的入行門檻非常高，不單要有專業知識，還要有天賜的福氣。對於專業知識，基本的禮儀和知識可以進修和找導師學藝，而坊間和機構的職業培訓都有相關的課程授與專業知識。然而要具備天賜的福氣，需要天時、地利、人和三個因素兼備。大妗姐又稱為『好命婆』，不單是只上有高堂，還要夫妻和睦、有兒、有女有孫，能夠四代同堂有如意的命途才能夠把福氣給予新人。華姨說，自從她十四年前家中添了孫，覺得像她那樣有福氣的人再不做大妗姐的話，行業便會失傳。華姨是大埔區人，兒孫都是在大埔土生土長，對於大埔區有著根深蒂固的歸屬感。

儀式的核心價值

傳統上禮節的講究，因為時代的改變有少許不同，但禮教的核心思想依然萬變不離其宗。譬如說，擇良辰吉日、過大禮、搬嫁妝、安床、上頭以至結婚，都會保留在儀式中。大妗姐既為上午婚禮的主持人，就像新娘的代母一樣，幫她打點一些被忽略的細節。畢竟禮教為中國文化的基礎，在婚禮儀式上為父母敬茶仍然是必要的環節，而大妗姐則確保儀式得體，為婚禮增添氣氛。

難忘經歷

入行多年，華姨總不免有難忘經歷。「離忘嘅事總會有嘅，不過多數都係開心嘅事。」華姨說：「都曾經見過有一對新人在婚禮當日遇到唔少困難。其實呢對新人非常之情投意合，男家都事業有成，但女方媽咪要求十分之高，認為個女應該要嫁個金龜婿，到結婚嗰日始終個新郎要斟茶俾個外母飲，佢始終都係唔肯飲。」面對這個場面，當時一眾兄弟姐妹親朋戚友都幫忙，希望新娘的母親能喝女婿的敬茶。面對這些棘手的事，擅於臨場應變的華姨當一個和諧的角色，作為他們婚禮的親善大使，勸哄了半天總算打破僵局，緩和了當時的尷尬氣氛。

工作之餘，華姨亦有開班授業，希望大妗姐這個行業能夠得以承傳，把傳統婚宴的禮儀文化繼續保存下去。

開業歷史 – 2004年

業務 – 婚慶
地址 – 大埔墟南盛街16號舖
電話 – 6733 7398

街市裡的綠洲 解憂舊書店

香港的書店，除了大型連鎖的那幾間外，很大部份的書店都已經遷往到樓上舖經營。設有飄書的書店，筆者不敢肯定，但相信應該不多。設有飄書兼座落於街市的書店，相信只此一家，解憂舊書店。

解憂這名字

解憂舊書店這個名字的由來，對於很多愛書的人，很快就會聯想起日本作家東野圭吾的《解憂雜貨店》。店主Phyllis當初想店名的時候，也花了一段時間。「如果改一個文學名好似會太高深，未必人人明白，剛好想到解憂雜貨店呢個咁有意思嘅名，於是就決定用喇！」的確，這是一個很好的名字。生活在香港這個壓力都市，如果有一個地方可以提供解決煩憂的良方，這將會是多麼的美好的地方！

自細的夢想

店主Phyllis從小就愛閱讀，開書店更是一直以來的夢想。「做全職媽媽有一段時間，阿仔依家已經讀中四，我覺得係時候可以實踐呢個夢想，家人亦都好支持。」Phyllis家住大埔區，選址亦希望在此附近。「附近舖位的租金唔平，我唔想開喺樓上舖，反而對這個人流不多的街市一見鐘情，除了租金比較平之外，寧靜的環境更適合於書店內閱讀的讀者。」

飄書到真正的用家

Phyllis非常感謝慷慨贈書的街坊朋友，令解憂舊書店可以很快就走上軌道。「我預左要守一段時間，慶幸得到附近街坊的支持及傳媒在開店初期的報道，很快就有很多人嚟贈書及幫襯買舊書。」免費飄書更是解憂舊書店的特色。「有d書如果要俾錢買大家喺唔會買，但如果喺免費嘅就會有人睇，例如一些舊版的旅行書，基本上大部份的熱門景點都唔會變，去完旅行番嚟又可以俾下一個人睇。」

如果有一個地方，可以解決我們所有的煩惱……那將會是寶湖道街市……

 

開業歷史 - 2016年

業務 - 書店
地址 - 大埔寶湖道街市F21
電話 - 5392 3220