時光倒流四十年 德隆辦館

啤酒、煙仔、汽水、唐酒和零食都是辦館和士多的招牌貨品，予樓上樓下街坊「買個方便」，不用四處找超市。然而，自從便利店普及後，市場的競爭大大增加，沒有分店的老字號不能大量購入分銷，在邊際利潤上輸了一場敗仗。守得住的苟延殘喘，但亦不希望下一代接手……

瀝源邨的舞台

從沙田鐵路站走到瀝源邨，要穿過新城市廣場、沙田中心和好運中心，再走過天橋才到，好不費功夫，基本上只有街坊和親友才會拜訪這個無人問津的沙田小角落。屋邨的平台上，都會有一個小小的遊樂場、茶餐廳、麵館，旁邊總有一、兩間士多，德隆辦館就是這樣，在普普通通的屋邨環境下長大。「四十幾年喇，當瀝源邨起好嘅時候我哋已經喺度。當時我阿媽投暗標，價高者得，嗰陣時嘅租金都係一千幾百。」第二代接班人許先生說。

從唐酒煙仔到平民化玩具

時至今日，德隆的面貌跟四十年前的不一樣了，因為年輕一代不愛喝唐酒，日常用品都會到大型超市入貨，所以這一類貨品的入貨量都比以前少。現在的店面掛滿各式各樣的玩具，不時吸引在平台耍樂的玩童到來。從遠處望過去，德隆更像一間文儀玩具店，但當你仔細走近看，內裡的格局依舊四十年不變，維他奶暖櫃和汽水鐵櫃依舊還在，洋酒仍有它棲身的地方。

德隆情

在沙田長大的許先生，自小就幫家人打理辦館的業務，對德隆有著密不可分的感情。「跟住就識咗佢喇！」許先生指著當年隔鄰海味店的小女孩笑說。許太太於是嫁夫隨夫，二人同心協力打理德隆這個家族小生意，現在兒子亦不時回店幫手。「店舖太多嘢要執喇，佢都係休息得閒過嚟幫下手，但要佢接手我寧願佢出去闖好過。」許太太說。

開業歷史  – 1976年

業務  –  辦館

地址  –  沙田瀝源邨富裕樓1樓S15號鋪

電話  – 2691 2967









-----------------------------------
各位喜歡筆為人知的朋友，
請你like & follow我們的Facebook Page，
給筆為人知一點支持和鼓勵。😃

https://www.facebook.com/untold.hk/

-----------------------------------

街坊集體回憶 嘉香汕頭魚蛋粉麵家

很多搬離舊區的老街坊，其中一樣最不捨得的就是從小已經光顧的街坊粉麵店。未必每間街坊粉麵店都能達到車胎人推薦的級數，但是卻能保證每條麵條均沾滿了「老火湯」的濃香，又怎樣能夠和新式的粉麵店相比呢？位於沙田瀝源邨的汕頭魚蛋粉麵家，雖然近年已經轉手改由新老闆朱先生經營，慶幸麵店的老味道仍能保存下來，實是瀝源街坊之福。

熟客接手

從前的汕頭粉麵家在瀝源邨落成後開始開業，一直也是瀝源街坊的開飯之選。近年舊店主年事已高，因而曾易手給外人轉營車仔麵店。可惜瀝源街坊始終鍾情傳統的潮式粉麵，於是現時的店主朱先生在2015年決定接手並延續街坊們至愛的牛腩麵。朱先生一家住在沙田區，並光顧了從前的汕頭粉麵家已經很多年。為了保存麵店的老味道，朱先生在開業時和舊店主取經學習炆牛腩，希望傳統的潮汕風味粉麵能夠繼續在瀝源邨承傳下去。

懷舊中創新

「我盡量保持到有舊時嘅味道，你望吓嗰舖嘅裝修都睇得出，唯一唔同嘅就喺我加咗兩部冷氣囉！」雖然店舖仍舊保持70年代的風味，牛腩依舊味香肉腍，但是作為新東主，朱先生亦有一些創新的想法加入傳統的粉麵店內。「舖頭都加咗啲小食俾客人食住等我整嘅麵，例如有咖哩魷魚、青口、豬皮蘿蔔，我哋夜晚仲有火鍋添，清湯腩煲喺啲街坊嘅至愛呀！」

隱世大廚

只是接手兩年多，筆者看見朱老闆切牛腩的刀功嘖嘖稱奇，怎樣看可也不像剛入行的外人。「我以前喺喜萬年酒樓做中菜嘅大廚架。你知嘛，成嗰中菜部做廚房嘅人工喺最高，因為我哋要顧嘅野最多，有好多功夫都係喺酒樓嗰度學識。」中菜大廚朱先生主理的潮式粉麵，並不是瀝源邨街坊獨享的。來到沙田區的你，不妨走多兩步到瀝源邨尋找隱世美食吧！

開業歷史 - 1975年

業務 - 粉麵

地址 - 沙田瀝源邨華豐樓2樓1號

電話 - 6128 8864









-----------------------------------
各位喜歡筆為人知的朋友，
請你like & follow我們的Facebook Page，
給筆為人知一點支持和鼓勵。😃

https://www.facebook.com/untold.hk/

-----------------------------------

念舊 南發皮具鞋業

筆者記得每年暑假其中一件最期待的事，就是到鞋店買一雙新的皮鞋及運動鞋以迎接新的學年。想當年，Yasaki運動鞋風靡一時，穿上一對Yasaki等於跟潮人劃上等號。因此，Yasaki運動鞋總是佔據舊式鞋店最當眼的角落。現在，舊式鞋店已經買少見少，取而代之的是一眾連鎖店及百貨公司的專櫃。

60年歷史的舊式鞋店

南發皮具鞋業屹立於沙田區接近60年，據店主黃太稱，舊店位於沙田正街，由其老爺創立。「南發絕對喺沙田區嘅老店之一，好多客人都話細細個曾經喺南發買過鞋，發現原來依家間舖仲喺度。」

見證父母對兒女的「愛」

南發舖內的裝潢跟一般的舊式鞋店相若，兩旁裝上一大塊玻璃，鞋子一雙一雙整齊地由門外一直伸展到店內。「以前喺舊式鞋店經常都會發生嘅事，就係學生哥要父母買鞋，整個過程由拒絕到妥協，每日都會不斷重覆發生。九零年代嗰陣，買Dr. Martens鞋嘅細路幾乎每一個要同父母喺我哋舖嘅門口大戰一場先可以成功買到。六、七百蚊一對以當時嚟講算喺幾貴。」鞋店東主告訴你，天下間哪有不愛自己兒女的父母呢？

念舊的客人

被問到難忘的事，老闆娘就道出數年前發生的這件事。「有一個四、五歲嘅男士入到嚟話要兩對鞋，佢嘅衣著好特別，條褲短到好似孖煙囪咁。佢好簡單試一試就話無問題，叫我俾個袋佢入住兩對鞋，同其他客好唔同，新鞋當然要試清楚啱唔啱著啦！佢俾咗錢之後，先同我講話原來佢細細個住喺沙田，之後移民咗去外國好多年，今次係特登番嚟香港想搵番以前有嘅舖。佢問咗好多街坊，知道南發仲有做緊。佢最開心就喺攞到印有南發呢個袋，等佢可以拎番去俾親戚睇到。」

對於經營老店的老闆，最感激的就是遇到念舊情的長情客人。

開業歷史 – 1959年

業務 – 鞋履

地址 – 沙田瀝源邨褔海樓2樓S12號舖

電話 – 2697 1321









-----------------------------------
各位喜歡筆為人知的朋友，
請你like & follow我們的Facebook Page，
給筆為人知一點支持和鼓勵。😃

https://www.facebook.com/untold.hk/

-----------------------------------

回憶守護者 百得真善美攝影

從事攝影三十年的嚴先生，因為哥哥姐姐都喜歡攝影，受家人的感染而踏入攝影行業。攝影師是歲月和回憶的守護者，把每一張照片製作成紀錄和歷史見證。隨著科技和攝影技術數碼化，香港的攝影沖曬店由行業全盛時期的一千多間，減至現時的三百餘間，當中嚴先生的姐姐的百合照相館亦於去年業主收回舖位，結束了三十三年的歷程。嚴先生當初的五間店，因沖印行業不敵時代巨輪，現在只留下瀝源邨的真善美店。門前金筆提名的牌匾，大型的人像油畫照片，和嚴家的清朝老照片和一系列他和女兒的寫照，不由得吸引我們進入店內，追溯他背後的故事……

行業的末落

嚴先生慨嘆，當初的龍頭企業柯達，為了成為數碼攝影的先鋒，最後落得破產重組的下場。「時代嘅變遷，無辦法㗎喇。我家姐當年喺沙田第一城嘅店都已經無做。柯達當年市值三百三十幾都破產咯，更何況係我哋呢？依家行業已經無辦法再請人喇，再加上租金，唔可能只係靠沖印，有時仲要靠外景攝影嚟幫補。嗰陣曬相一張3R要個半一張，依家一蚊一張，都跟唔上通脹啦！」

數碼化與哈蘇機

雖然菲林攝影由十年前攝影技術數碼化開始已退化，嚴老闆亦與時並進把照片數碼化。店內一些人像油畫，本來是一些陳舊的老照片，嚴老闆用電腦把它們重新數碼化編輯然後放大印成高清油畫。除此之外，店內的鎮店之寶哈蘇機，是嚴先生在八十年代時為幫客戶拍証件相不惜花數萬元購入。現在雖然也會有些行家會高購向他收購，但他怎樣不會賣掉這部哈蘇機。

開店三十年，除了沙田的老顧客外，還有諾貝爾物理學家楊振寧教授，和為真善美店招牌題字的前中大校長金耀基也有到此光顧。

開業歷史  - 1987年

業務  -  照相

地址  -  沙田瀝源邨購物中心福海樓3 樓7號舖

電話  - 2605 1688









-----------------------------------
各位喜歡筆為人知的朋友，
請你like & follow我們的Facebook Page，
給筆為人知一點支持和鼓勵。😃

https://www.facebook.com/untold.hk/

-----------------------------------

經營有道 沙田友隱形眼鏡中心

位於瀝源商場的沙田友，是胡金鴻先生的眼鏡店。「當初喺禾輋打工，但打工收入其實有限，同埋眼鏡行鏡嘅特色就係，如果你有專業的技術，你就可以自己出嚟創業。」為了家人和小孩有更好的生活，胡老闆於三十年前便決定出來創業，在沙田創立了「沙田友」，而太和的眼鏡店是胡老闆的弟弟管理的。

自立門戶 不隨波逐流

胡老闆說，他當初在禾輋的日昌眼鏡打工，而日昌正是當年眼鏡88 的前身。眼鏡88於1984年由一班視光師成立後，短短四年間便開了十間分店，於1988年被寶光實業收購為旗下的品牌。胡老闆並沒有跟隨舊店，便在那個時候在沙田瀝源自立門戶，希望自己能在行內闖一番事業。

待客以誠

在行業打滾了三十年，沙田友經歷了多個經濟周期仍屹立不搖，當中最重要的是待客以誠。「當年沙士係最困難的一年，其實每一行都生意都唔同。我哋呢啲小店唔可以賣廣告搵生意，唯一就係你要做得好你自己嘅業務，口碑好自然就會有顧客。有一日有一個顧客嚟買眼鏡，幫襯我地店舖，後來我先知佢係周刊嘅記者，之後嗰段時間生意有好轉。其實我哋每日都做好自己嘅工作，後來都有啲海外嘅顧客慕名而來，主要都係要靠好嘅口碑。」對於小店和連鎖店的競爭，胡老闆說他的重點市場在於顧客的回頭率。小店的經營方法，不外乎是做「街坊生意」，很少時間會遇到「流水客」，做好自己的本份，自自然便會留得住顧客。

最細心的視光師

談到驗眼，大家都會認為用電腦測量的度數配鏡是最準確的。其實用電腦設備驗眼僅具參考價值，至於散光的誤差會更大。胡老闆說，最準確的驗眼方法是檢影驗光，方法是靠一支檢影燈的一小束光線照射到顧客的瞳孔，以光影走動到視網膜的投影點來診斷顧客的近視和散光度數。用這個方法驗眼，不單是需要視光技術和專業知識，還是靠視光師多年的累積經驗。一副舒適和度數正確的眼鏡，是需要一個像胡先生這樣細心和盡責的視光師才做到的。

開業歷史  – 1987年

業務  – 眼鏡

地址  –  沙田瀝源商場206號舖

電話  – 2695 4726









-----------------------------------
各位喜歡筆為人知的朋友，
請你like & follow我們的Facebook Page，
給筆為人知一點支持和鼓勵。😃

https://www.facebook.com/untold.hk/

-----------------------------------

有商有量 豐昌辦館

在日常生活中頻頻光顧便利店及超市的你，究竟有多久沒有光顧過辦館呢？其實，這條問題應改為，究竟香港還有多少間辦館可讓你光顧？

年中無休 經營超過40年

今次的受訪者曾先生，是豐昌辦館老闆娘呂小姐的兒子。 「媽媽每日朝早五點九開舖，年中無休，每日工作十五個鐘。」1975年開業到現在的豐昌辦館，陪著瀝源邨街坊已經超過四十年。 「以前朝早六點有唔少學生會嚟買樽裝鮮奶做早餐，不過依家已經無賣鮮奶喇，主要有一班地盤工人會喺開工前過嚟買勞工手套同支裝水。」

貨品應有盡有

豐昌辦館可以說是一眾學生哥的零食天堂。辦館門前放滿各式各樣的「平價」一兩蚊零食，散裝的糖果、朱古力、餅乾等均有發售。「賺少啲，但可以方便附近嘅學生哥。」辦館當然不少得酒，中國酒如田七酒、三蛇酒、鹿筋酒等等均在「收藏」之列。白蘭地和威士忌則是一眾豪客之愛。「為順應潮流，我哋連紅酒都有賣喇。」另外，這裡更有散裝米發售。「幾蚊都賣，方便附近住嘅公公婆婆嘛！佢哋好多都係一個人住，食米食得唔多，擺得耐就唔新鮮，超級市場唔會散裝賣俾你。」

街坊生意 「信」字行先

整個訪問過程，令筆者最有深刻印象的就是貼在收銀櫃旁的記帳單，單上寫上一堆用作識別賒數人的別名及數目。「阿公交帶落，個別街坊我哋會賒數俾佢哋。佢哋都係幫襯開嘅老街坊，經濟能力唔係太好。當佢哋買完野之後，我哋都會先記數，月尾或者幾個月後佢哋會再嚟找數。」

「爸媽年紀大，全日長時間睇舖會好辛苦，所以盡可能都會到舖頭幫手。」曾先生本身從事室內設計。「事業同父母嘅健康，的確需要取捨。阿爸阿媽健康差，就算做室內設計賺幾多錢都無用，倒不如多啲到舖頭幫手令佢哋開心啲而佢哋又冇咁辛苦咪仲好啦！」

 

開業歷史 – 1975年

業務 – 辦館

地址 – 沙田瀝源邨華豐樓平台

電話 – 2691 6678

 

將心比心 盛記麵家

在瀝源邨的盛記麵家，是張家第三代的老字號大牌檔。B哥的嫲嫲機緣巧合下，在沙田舊區把當時一間大牌檔接手來做。當時B哥長大的地方沒有電，沒有自來水，盛記在沙田舊區只做白天，冬天的時候還要斬柴燒木來取暖。現在的沙田，已經住了八十多萬人，誰會想到這裡曾經是一個蓋滿了二萬多間蓋滿寮屋的小鎮呢？

根在沙田

B哥從小就十分知足，不敢奢望名譽和地位，對於經營盛記，他便有一套獨特的看法。「呢間唔係只為賺錢嘅店，我哋一直都喺沙田長大，唔會捨得嗰種血肉相連嘅感覺，呢個地方係我嘅根……你話做好啲賺少啲都唔緊要，最重要係服務街坊，大家都開心。」B哥不侈求富貴，只求平安和喜樂，亦希望更多人受惠，把喜樂分享給他們。三年前開始，有幸得到社會的慷慨解囊，去年中秋更得各行各界捐出六千個月餅。B哥說能夠與瀝源邨的老街坊同樂，才是一件開心的事。

文藝小館

在屋邨內的盛記，十分有文藝氣色。當有空的時候，B哥都會收集一些街坊送來的懷舊擺設，包括一些二手書、懷舊照片、燈飾等，好好把小店粉飾一番。更有趣的是，白天的盛記麪家，晚上會搖身一變成為一間火鍋店，以便吸引外來的客人。「瀝源邨始終係人口老化，消費力比較弱，希望都吸引下唔同嘅消費群，先至可以令盛記營運到。」B哥說要做好生意，需要兼顧食物質量、待客之道和做事態度。

時代見證

談到多年來難忘的事，B哥帶我們到後園參觀一棵大樹菠蘿。「呢棵樹二十歲喇，當時係我朋友結婚嗰陣種嘅，生命唔係剩係人同動物，植物都有生命，我哋都會保護佢，同埋呢個都係一個時間嘅見證。」B哥慨歎。「時間就係咁飛逝咗，周圍都改變晒，但呢棵樹無變，令我諗起好多當時嘅事，好多以前嘅回憶……」其實守護一棵樹，就像孕育一份事業、一間老店，更何況是三代遺傳下來的產業呢。問到生命中最寶貴的事，B哥說：「我生命中最大嘅財富就係回憶，呢啲回憶俾到我更大嘅動力做好呢一刻嘅自己……」

開業歷史  – 1956年

業務  –  餐飲

地址  –  沙田瀝源邨熟食中心

電話  – 26926611