快將消失的手藝 祥記玻璃鏡器

位於北角的祥記玻璃鏡器，六十年代已經在渣華道這個位置經營，是該區僅存的傳統玻璃鏡舖。這殘舊不起眼的玻璃鏡舖跟對面30多層高的新樓盤形成強烈的對比，而你有否想過低調的祥記其實也曾有輝煌的歲月……

生意大不如前

「好多傢俬、餐檯、浴室鏡、鋁窗等等都係用玻璃做材料，以前家家戶戶都有需要搵玻璃舖訂做……」祥記負責人蔣小姐慨嘆地道出現在香港的玻璃業已近被淘汰。「依家香港就算起好多新樓我哋都唔會點受惠到，發展商會幫每一間新屋都做哂裝修，佢哋為咗慳成本都會交哂俾大陸啲廠做，然後再運落嚟裝。」蔣小姐苦笑地說。「如果有一、兩件玻璃打爛咗，我哋就有得執嚟做。」

行業式微

在訪問途中，碰巧師傅正在切割玻璃，然後再磨滑玻璃邊緣。師傅熟能生巧的手藝，是五十多年來努力的肯定。「玻璃業已經式微，無人入行。時代唔同喇，依家呢一代嘅香港人只係識投機投資，揀一啲唔使用氣力嘅工嚟做。」蔣小姐感慨地說。「做呢一行一定要跟師傅學先會識，無得速成。依家有好多人求其跟做裝修幾日就叫自己做師傅，接咗客嘅單做再算，咁樣做裝修真係好不顧後果。」

名畫的由來

筆者發現在舖內暗角處掛起一幅題為泰山日出的「名畫」，為何店主不把它掛在當眼處供大家欣賞？「講起嚟都覺得奇怪，呢件事都有成20年喇，當時有個客攞幅畫嚟鑲畫框，跟住又唔肯俾尾數，你唔俾錢，我當然唔俾貨啦！之後都仲有見到呢個客，同佢講話你幅畫仲喺到喎，佢當聽唔到你講野。」開店50多年，奇怪、走數、出古惑的客人蔣小姐見識不少。「有人試過話買兩件玻璃，俾咗少少訂，之後就嚟舖頭攞咗一件玻璃先，攞完第二件先找尾數，當然就梗係無啦。實情係佢只需要一件玻璃，諗住俾少少錢就買到，後尾見佢有幾次經過舖頭，頭耷耷就走咗，又係叫佢都唔應你。」

蔣小姐及其家人憑著他們的手藝，為香港築起無數個家庭。隨著時代的變遷，即使玻璃的需求還在，香港的玻璃業已幾近被國內廠家取締。行業的式微，即代表玻璃手藝將要面對被消失的命運。難道，我們只能像蔣小姐這樣說，「做一日和尚唸一日經」去面對？

開業歷史 - 1960年代

業務 - 玻璃

地址 - 北角渣華道15號A地下

電話 -  2578 2712











-----------------------------------
各位喜歡筆為人知的朋友，
請你like & follow我們的Facebook Page，
給筆為人知一點支持和鼓勵。😃

https://www.facebook.com/untold.hk/

-----------------------------------

玻璃之情 鏡明玻璃

現年快近七十歲的他，當年唸完小學後便要在鏡明跟隨父親和店裡的師傅學藝。他沒有三頭六臂，卻精通書法、畫畫、中醫、跌打、裝修等等，堪稱樣樣皆能。陳漢興，鏡明「歷史博物館」第三代主理人，見證著上海街的起與落。

鏡明的歷史

九十年在上海街的歷史，寫著「鏡明」的大招牌高高的懸掛在店中央當眼的位置，再加上不同的山水、字畫、佛像等畫作掛滿兩邊牆壁，說鏡明是歷史博物館，真的一點也不為過。「鏡明由阿爺創立，舊舖喺依家嘅上海街360號，六十多年前因重建而搬到呢度。阿爺當年想做生意，喺一次喊欄買咗刻有鏡明呢個招牌，再請咗幾個師傅做玻璃，就係咁開始咗。」年「少」無知的筆者不知道原來當年窩打老道對開就是避風塘，因此水上人家成為了鏡明最主要的顧客。他們很喜歡題字在玻璃牌匾上用作送禮恭賀朋友新船入伙或舖頭開張。

上海街今昔

往昔的上海街繁華熱鬧，現今已被彌敦道取締。漁業式微，水上人亦不再以船為家，對鏡明的生意亦造成有一定的影響。「為咗生活，咩都要試下。阿爸試過租半邊舖出去俾人賣衫，當年香港成日制水，我哋就賣大木桶，仲有過年前會賣年花啦!」陳老闆對於爸爸在生意經營上的變通表示萬分敬佩。「依家主要係賣畫框相框，如果呢到唔係自己舖，真係會好難做。呢個舖係我哋咁多兄弟姊妹聚首一堂嘅地方，點都會守住佢唔會賣。」親情，永遠是無可取代的。

蘇富比名照

除了上海街悠久的歷史外，鏡明另一聞名之作就是一張四代同堂聚首的照片。2009年，這張照片在香港蘇富比拍賣會上賣出作慈善用途。溫馨的家庭照片，蘊藏著一家人齊齊整整並和洽相處的珍貴意義。照片成功的在拍賣會上賣出，更深的意義代表著親情在蘇富比買家的眼中得到了垂青和肯定。

陳老闆雖然時常謙稱自己讀書少，但掛在牆上的書法作品卻全出自老闆自己的手筆，筆者作為晚輩感到自愧不如。「唔好咁講，嗰陣學寫字喺要嚟搵食，後生仔做多啲、學多啲，將來得益嘅會係你自己。」一個人的文化修養從來跟讀書的多與少並沒有關係。「我相信唔係個個人都會願意同你哋傾計，我好希望能夠將上海街舊時嘅事同大家講下，咁先可以傳揚落去。」五十六分鐘的對話，筆者最感動就是這刻。

 

開業歷史 – 1927年

業務 – 玻璃
地址 –  油麻地上海街111號
電話 – 2384 4392