開門七件事—柴、米、油、鹽、醬、醋、茶，所指的是我們中國人維持日常生活的必需品。今次筆為人知訪問的主角悅和醬園雖然不是做足「七件事」，但是悅和的醬和醋在本港卻有著崇高的地位，絕不遜色於在超市擺賣的幾大品牌。能夠屹立荃灣超過七十年，可見傳統老店做醬的功力。
醬園歷史
龐元用是悅和醬園的第二代掌舵人，每天都坐在店舖內中間的管理層位置，看管著店內一切大小的運作。「爸爸跟同鄉兄弟一齊創立悅和醬園，1945年喺荃灣開設門市和廠房，1973年將廠房搬到上水古洞，1975年亦將門市搬到依家呢個舖至今。」龐先生對我們說出悅和醬園開業的歷史。「我哋廣東人最識食，以前做醬係一啲家庭式嘅行業，每家每戶都會有獨特嘅秘方。大家對食只會越嚟越有要求，於是就決定開醬園，將廣東佛山做醬嘅技術帶到嚟荃灣。」
保證新鮮
「做豉油記緊四大原材料，黃豆、麵粉、糖和鹽，加上天然生曬再發酵，就可以做到一支靚嘅豉油。」究竟跟外面買的豉油有什麼不同呢？龐先生說：「悅和嘅豉油新鮮啲囉！出面啲品牌因為要到超級市場上架，所以要行大眾路線，每支豉油嘅食用期限起碼要有2-3年。」龐先生走過去隨手拿起一支豉油給我們看，只有一年期限。「我哋嘅豉油都可以擺耐啲，不過無咁嘅需要，因為我哋唔係大規模生產，可以因應需求而增加或者減少生產，保證客人可以買到最新鮮嘅豉油。」
美麗的錯誤
除了做醬外，悅和是少數同時擁有蒸酒牌的醬園公司。原來要做一支純自家製的醋，是必須先進行釀酒，再把製成的酒加上其他材料混合一起發酵才行。「其實都好有趣，若果係釀酒嘅發酵過程發生錯誤，可能係因為天氣變化嘅關係，酒就會變咗醋。因為我哋有造釀酒，所以蒸酒之後嘅日積月累精華就會用嚟做醋，就係咁，醋於是就變咗係酒嘅副產品。」訪問當天，見到不少準嫲嫲、準婆婆前來門市購買甜醋和黑糯米醋回去煲豬腳薑，為其女兒、新抱作產後補身之用。
作為傳統老店，悅和亦與時並進，明白顧客近年對食物安全的重視。「我哋醬園已經獲得ISO 9001:2008國際品質保證和HKQAA - HACCP 世界公認食品衛生證書，令顧客可以食得開心又放心。」龐先生對悅和的出品非常有信心。「香港人依家好重視食品嘅衛生，所以我哋呢啲本土製嘅產品都受到好多荃灣街坊同埋餐廳歡迎。」堅持傳統方法、香港製做加上龐先生現代式管理，這就是悅和醬園深獲街坊支持逾七十年的成功之道。
開業歷史 - 1938年
業務 - 醬料
地址 - 荃灣街市街33號地下
電話 - 2492 3354-----------------------------------
各位喜歡筆為人知的朋友，
請你like & follow我們的Facebook Page，
沒有留言:
張貼留言