要尋找世間上低調的高手一點也不難，此人就在筲箕灣港鐵站的轉角位。繁忙時間長長的人龍站在店外，令店主Michael此等高手無法再低調下去。所有高手的故事也是從失敗開始說起，由最初失業，到開店初期「拍烏蠅」，直到現在變成明星級小食店， Michael的故事也不例外。
如何煉成真．高手
Michael原本從事IT行業，當年在待業期間決定一試自己做老闆。「嗰陣諗住做飲食唔使砸貨，只係得我一個人做，就決定賣小食啦！開頭就諗住賣雞蛋仔及魚蛋，不過附近有安利魚蛋粉，啲人喺安利食完魚蛋未必會再過嚟食，而附近無雞蛋仔店，所以我就賣雞蛋仔先。」Michael謙稱自己也是上網學整雞蛋仔，不斷反覆嘗試才研發到現在的秘方。「試過一日只係賣得三底雞蛋仔 。」最初生意不佳，卻令Michael有更多時間想想這店的名字。
唔怕生壞命 最好改啱名
「開店嗰陣都仲未幫間舖改名，因為無乜生意，得閒嗰時諗下諗下就諗到呢個名。」Michael笑著對我們說。「兩個月之後因為嗰店名就開始吸引到客嚟試，啲客試過好食，靠口碑就開始多人嚟幫襯喇，如果無呢個名我間舖可能已經執咗喇！」Michael的故事告訴我們，鬼馬的名字可以吸引食客，再加上質素好的食物就可以留客，成功之道就是這樣簡單。「我哋嘅雞蛋仔有咩特別？夠正宗囉！你會食得番以前嘅味道，外脆內軟，食完會想再買多底食。」
明星小店
「對我嚟講最開心嘅就係得到好多顧客嘅認同，連外國傳媒CNN都有選我哋係全球最佳街頭小食之一。」店內還掛了容祖兒親筆簽名的海報。「好榮幸容祖兒邀請我去佢嘅演唱會，喺後台整雞蛋仔同埋格仔餅俾佢同埋就啲同事一齊吃。仲有謝霆鋒之前做嘅十二道鋒味，都有邀請我哋去維園協助整三千底雞蛋仔，都令我好難忘。」Michael的創舉推廣了香港的街頭小食，高手從此不再低調，但美食依舊在民間！
開業歷史 - 2009年
業務 - 街頭小食
地址 - 筲箕灣東大街76A號B3號舖地下
電話 - 6601 5300-----------------------------------
各位喜歡筆為人知的朋友，
請你like & follow我們的Facebook Page，
給筆為人知一點支持和鼓勵。😃
-----------------------------------
沒有留言:
張貼留言